प्राकृतिक प्रकोपमा ४५४ को मृत्यु, साढे चार अर्ब क्षति « Nagarik Khabar

प्राकृतिक प्रकोपमा ४५४ को मृत्यु, साढे चार अर्ब क्षति



काठमाडौं । गत वर्ष मुलुकका विभिन्न स्थानमा भएका प्राकृतिक प्रकोपमा परी ४५४ नेपालीले ज्यान गुमाएका छन् । गृह मन्त्रालयअन्तर्गतको राष्ट्रिय आपत्कालीन कार्य सञ्चालन केन्द्रले सार्वजनिक गरेको तथ्याङ्कअनुसार प्रकोपमा परी चार हजार १८८ घाइते भएका छन् ।

प्रकोपबाट ११ हजार ५३३ परिवार प्रकोपबाट प्रत्यक्ष प्रभावित भए । चार हजार २८२ वटा प्रकोपको घटनाबाट मुलुकलाई रु चार अर्ब ४० करोड ८९ लाख क्षति पुगेको अनुमान गरिएको छ । प्रकोपबाट ६८९ स्थानीय तह प्रभावित भए भने तीन हजार ४३६ घरमा क्षति र तीन हजार ६५४ घर ध्वस्त भएका छन् ।

मानवीय क्षतिका दृष्टिकोणबाट प्रदेश नम्बर २ बढी प्रभावित रह्यो । सो प्रदेशमा प्रकोपबाट ८३ ले ज्यान गुमाए । त्यस्तै, प्रदेश नम्बर ३ का ८१, प्रदेश नम्बर १ का ७९, प्रदेश नम्बर ५ का ७०, गण्डकी प्रदेशका ६४, कर्णाली प्रदेशका ४१ र सुदूरपश्चिम प्रदेशका ३६ जनाले विभिन्न घटनामा परी ज्यान गुमाए ।

भौतिक पूर्वाधार क्षतिका हिसाबले पनि प्रदेश नम्बर २ ले बढी क्षति व्यहोर्नु पर्यो । सो प्रदेशमा प्रकोपले एक अर्ब ८४ करोड २७ लाख बराबरको क्षति पुर्याएको केन्द्रले अनुमान गरेको छ । त्यस्तै प्रदेश नम्बर १ ले ९५ करोड ७२ लाख रुपैयाँ, प्रदेश नम्बर ३ ले ७४ करोड ३४ लाख रुपैयाँ, प्रदेश नम्बर ५ ले ४० करोड ७७ लाख, गण्डकी प्रदेशले २६ करोड ९३ लाख, कर्णाली प्रदेशले १३ करोड ३० लाख र सुदूरपश्चिम प्रदेशले पाँच करोड ५६ लाख रुपैयाँ अनुमानित क्षति व्यहोरेका केन्द्रको तथ्याङ्कमा उल्लेख छ ।

सोही वर्ष प्रकोपबाट प्रदेश नम्बर २ मा मानवीय तथा भौतिक क्षति बढी भए पनि प्रकोपका घटना भने प्रदेश नम्बर १ मा बढी भए । प्रदेश नम्बर १ मा एक हजार ३४ विभिन्न घटना भएको केन्द्रले जनाएको छ । यसैगरी प्रदेश नम्बर २ मा ९४३, प्रदेश नम्बर ३ मा ७२१, प्रदेश नम्बर ५ मा ७०९, गण्डकी प्रदेशमा ३६७, सुदूरपश्चिम प्रदेशमा २९४ र कर्णाली प्रदेशमा २१४ वटा प्रकोपका घटना भए ।

गत वर्ष सबैभन्दा बढी आगलागीबाट ८९ जनाले ज्यान गुमाए । त्यस्तै बाढी पहिरोमा परी ८८, चट्याङ लागेर ६८, हावाहुरीबाट ४५, जङ्गली जनावरको आक्रमणमा परी २७ र अन्य कारणबाट ३१ जनाले ज्यान गुमाएका छन् ।

सबैभन्दा बढी मानवीय क्षति व्यहोर्ने जिल्लाका रुपमा बारा रह्यो । बारामा गत वर्ष २९ जनाले ज्यान गुमाए भने सोलुखुम्बुमा २१, दाङमा २०, म्याग्दीमा १४, जाजरकोटमा १२ र बझाङ, बागलुङ, पर्सा, रसुवा तथा चितवनमा भएका घटनामा परी १३÷१३ जनाले ज्यान गुमाए ।

केन्द्रले सार्वजनिक गरेका तथ्याङ्कमा चैत महिनामा सबैभन्दा बढी प्रकोपका घटना भएका छन् । चैतमा ४८६, वैशाखमा ४४९, पुसमा ४३८, साउनमा ३७२, भदौमा ३६९, माघमा ३६४, कात्तिकमा ३६१, फागुनमा ३५१, मङ्सिरमा ३१७, असारमा २९९, जेठमा २८९ र असोजमा १८७ प्रकोपका घटना भए ।

मानवीय क्षतिका हिसाबले साउन चैत महिना सबैभन्दा बढी क्षति हुने महिनाका रुपमा रह्यो । चैतमा विभिन्न घटनामा परी ६६ जनाले ज्यान गुमाए । गत चैतमा बारा र पर्सामा मात्रै हावाहुरीबाट २८ जनाले ज्यान गुमाएका थिए । साउनमा ६२, भदौमा ५१, जेठमा ४६, वैशाखमा ४५, असारमा ४३, माघमा ३०, असोज र पुसमा २८÷२८, कात्तिकमा २२, मङ्सिरमा १८ र फागुनमा १५ जनाले ज्यान गुमाएको केन्द्रले जनाएको छ ।

.आर्थिकरुपमा साउन महिना सबैभन्दा बढी क्षति पुगेको केन्द्रको तथ्याङ्क छ । साउन महिनामा एक अर्ब ३४ करोड नौ लाख रुपैयाँको क्षति पुगेको अनुमान गरिएको छ । त्यस्तै कात्तिकमा ३९ करोड ७२ लाख, चैतमा ३८ करोड ५१ लाख, असोजमा ३४ करोड ३५ लाख, जेठमा ३२ करोड ६८ लाख, मङ्सिरमा ३२ करोड ३१ लाख, वैशाखमा २७ करोड ५७ लाख, पुसमा २७ करोड ११ लाख, माघमा २२ करोड ४५ लाख, भदौमा २२ करोड दुई लाख, फागुनमा १९ करोड २७ लाख र असारमा १० करोड ८१ लाख रुपैयाँ मुलुकले आर्थिक क्षति व्यहोरेको केन्द्रको भनाइ छ ।

प्रतिक्रिया दिनुहोस्

%d bloggers like this: