प्यूठानमा सामुदायिक विद्यालयप्रति आकर्षण बढ्दो « Nagarik Khabar

प्यूठानमा सामुदायिक विद्यालयप्रति आकर्षण बढ्दो



प्यूठान । अङ्ग्रेजी माध्यमबाट अध्यापन गराउन थालेपछि यहाँका एक सामुदायिक विद्यालयमा पढ्न आउने विद्यार्थीको सङ्ख्या ह्वातै बढेको छ ।

प्यूठान नगरपालिका–८ बाग्दुलास्थित जनता माध्यमिक विद्यालयले कक्षा नर्सरीदेखि १० सम्म अङ्ग्रेजी माध्यमबाट अध्यापन गराउन थालेपछि अहिले निजी विद्यालय छाडेर पढ्न आउने विद्यार्थीको सङ्ख्या ह्वातै बढेको हो ।

निजी विद्यालयबाट आएका विद्यार्थीलाई प्रवेश परीक्षा लिएर उतीर्ण भएपछि मात्र सो विद्यालयले भर्ना लिने गरेका छन् । जिल्लाका नमूना मानिने यस सामुदायिक विद्यालयमा बिहीबारसम्म स्थानीय निजी विद्यालयबाट १५० भन्दा बढी विद्यार्थी प्रवेश परीक्षामा सामेल भएको विद्यालयले जनाएको छ ।

प्रवेश परीक्षा दिने विद्यार्थीमा अधिकांश बोर्डिङ स्कूलबाट आएको प्रधानाध्यापक इन्द्रमणि पोख्रेलले जानकारी दिए । सरकारी विद्यालयमा पढने छोराको चाहना र सरकारी विद्यालयमा पढेका विद्यार्थीलाई सरकारले विभिन्न छात्रवृत्ति र उच्च शिक्षामा सहुलियत दिने भएकाले छोरालाई सरकारी विद्यालयमा भर्ना गर्न परीक्षामा सामेल गराएकी लक्ष्मी नेपालीले बताईन् ।

विगतमा सामुदायिक विद्यालयबाट बोर्डिङ जाने विद्यार्थीको सङ्ख्या बढ्दो थियो तर अब अङ्ग्रेजी माध्यमबाट शिक्षण शुरु भएपछि निजी विद्यालय छोडेर सरकारी विद्यालयमा आउने सङ्ख्या बढ्दै गएको विद्यालय व्यवस्थापन समितिका अध्यक्ष गेहराज शर्माले बताए । उनका अनुसार सामुदायिक विद्यालयप्रति बढ्दो आकर्षण माध्यमको साथमा विद्यालयको भौतिक, मानवस्रोतलगायत उचित शैक्षिक वातावरण तयार गर्दै लगिएको छ ।

तालीम प्राप्त शिक्षक, उचित शैक्षिक सामग्री, सुविधा सम्पन्न भवन, प्राविधिक शिक्षासहितको शैक्षिक वातावरण बने सामुदायिक विद्यालय विद्यार्थीको आकर्षणको केन्द्र बन्ने निश्चित छ ।

 

 

 

प्रतिक्रिया दिनुहोस्

%d bloggers like this: