नयाँ बसपार्क क्षेत्रमा देखिएको विकृति हटाउने प्रहरी प्रतिवद्धता « Nagarik Khabar

नयाँ बसपार्क क्षेत्रमा देखिएको विकृति हटाउने प्रहरी प्रतिवद्धता



काठमाडौं । नयाँ बसपार्क क्षेत्रमा हुने विकृति विसङ्गति अन्त्य गरिने भएको छ ।

सामुदायिक सेवा केन्द्र र सामुदायिक प्रहरी सेवा केन्द्र गोँगबुले आज यहाँ आयोजना गरेको कार्यक्रममा शान्त, सुरक्षित र सभ्य नयाँ बसपार्क निर्माण गर्न गोँगबु क्षेत्रमा देखिएको विकृति विसङ्गति अन्त्य गर्नुपर्नेमा जोड दिइएको हो ।

कार्यक्रममा महानगरीय प्रहरी परिसर काठमाडौँका प्रमुख प्रहरी वरिष्ठ उपरीक्षक उत्तमराज सुवेदीले गोँगबु क्षेत्रको विकृति अन्त्यको लागि स्थानीय समुदायको महत्वपूर्ण भूमिका रहेको बताउनुभयो । “नयाँ बसपार्क क्षेक्रमा हुने अनैतिक त्रियाकलाप विरुद्ध प्रहरी कठोर रुपमा उभिन्छ”, उहाँले भन्नुभयो । परिसर प्रमुख सुवेदीले व्यवसायको नाममा विकृति फैलाउने जोकोहीलाई पनि कारवाही गरिने बताउनुभयो ।

गोँगबु क्षेत्रका नागरिकले पीडकको पक्षमा भन्दा पीडितको पक्षमा आवाज उठाउनुपर्ने उहाँको भनाइ थियो । टोखा नगरपालिका–९ का अध्यक्ष जोगप्रसाद नेपालले मर्यादित भएर आफ्नो व्यवसाय सञ्चालन गर्न व्यवसायीलाई आग्रह गर्नुभयो । “होटल व्यवसायको शिलशिलामा देखिएका कानूनी अप्ठ्यारा समाधानका लागि नगरपालिका सधैँ लाग्नेछ”, उहाँले भन्नुभयो ।

नेपाल यातायात व्यवसायी राष्ट्रिय महासङ्घका महासचिव सरोज सिटौलाले यातायात क्षेत्रको सुधारका लागि गोँगबु क्षेत्रमा मापदण्ड विपरीत सञ्चालन भएका बाटोका पसल हटाउनुपर्ने बताउनुभयो । “नयाँ बसपार्क वरपर जथाभावी रुपमा सञ्चालन भएका टिकट काउन्टरलाई बसपार्कभित्र लैजान महासङ्घ लागिपरेको छ”, उहाँले भन्नुभयो ।

काठमाडौँ होटल व्यवसायी सङ्घका अध्यक्ष पदम योङहाङ, नेपाल होटल व्यवसायी सङ्घका महासचिव गणेश ढकाललगायतले नयाँ बसपार्क क्षेत्रमा समस्याका रुपमा रहेको होटल गाइड हटाउन आफ्नो सङ्घ लागेको उल्लेख गर्नुभयो ।

सामुदायिक सेवा केन्द्र गोँगबुका अध्यक्ष राकेश सिंहले नमूना गोँगबु निर्माणका लागि सामुदायिक सेवा केन्द्रले काम गरिरहेको बताउनुभयो । कार्यक्रममा गोँगबु क्षेत्रमा कार्यरत विभिन्न सङ्घ संस्थाका प्रतिनिधि तथा सदस्यले मर्यादित रुपमा आफ्नो व्यवसाय सञ्चालन गरेर बसपार्कलाई नमूना बसपार्क बनाइनुपर्नेमा जोड दिनुभयो ।

प्रतिक्रिया दिनुहोस्

%d bloggers like this: