मेचीदेखि पश्चिम महाकालीसम्म पाँच ठूला र सुविधासम्पन्न अस्पताल निर्माण गर्छौं : उपप्रधानमन्त्री यादव « Nagarik Khabar

मेचीदेखि पश्चिम महाकालीसम्म पाँच ठूला र सुविधासम्पन्न अस्पताल निर्माण गर्छौं : उपप्रधानमन्त्री यादव



वीरगंज । उपप्रधान, स्वास्थ्य तथा जनसङ्ख्या मन्त्री उपेन्द्र यादवले देशमा रहेको सातवटै प्रदेशमध्ये प्रदेश नम्बर २ अतिपिछडिएकाले यसको विकासतर्फ सबैले ध्यान दिनुपर्ने बताएका छन् ।

वीरगञ्ज महानगरपालिका–१५ मा नवनिर्मित बस टर्मिनल भवनको मंगलबार उद्घाटन गर्दै उनले भने, ‘प्रदेश नं २ को विकास र समृद्धिका लागि तिन वटै तहका सरकार, निजी क्षेत्र र सरोकारवाला सबै पक्ष सहयोग, समन्वय र सहकार्यका साथ अगाडि बढ्नुपर्दछ ।’

उपप्रधानमन्त्री यादवले वीरगञ्जस्थित नारायणी उपक्षेत्रीय अस्पताललाई केन्द्रीय अस्पताल बनाउन स्वास्थ्य मन्त्रालयले एक अर्ब ५७ करोड रुपैयाँ विनियोजन गरेको उल्लेख गर्दै कुनै पनि नेपाली नागरिक बिरामीबाट नमरुन् भनेर सङ्घीय सरकारले प्रत्येक गाउँमा एक अस्पताल, प्रत्येक वडामा एक स्वास्थ्यचौकी, शहरमा सुविधा सम्पन्न अस्पताल तथा महानगरस्तरीय अस्पताल बनाउने सोचका साथ अगाडि बढीरहेको धारणा व्यक्त गरे ।

अहिले मुलुकमा विभिन्न स्तरबाट सङ्घीयता र गणतन्त्रमाथि ग्रहण लगाउने प्रयास भइरहेको उल्लेख गर्दै उहाँले सङ्घीयतालाई सबल, सदृढ र संस्थागत विकासका लागि सबैको प्रयास आवश्यक रहेको बताए ।

शहरी विकासमन्त्री महम्द इस्तिहाक राईले वीरगञ्जको समग्र विकासका लागि सङ्घीय सरकार पर्याप्त मात्रामा बजेट विनियोजन गरिएकाले यसको इमान्दारीपूर्वक सदुपयोग गर्नुपर्नेमा जोड दिँदै पूर्व मेचीदेखि पश्चिम महाकालीसम्म पाँच वटा ठूला तथा सुविधासम्पन्न अस्पताल बनाउने सोचका साथ सङ्घीय सरकार अगाडि बढेको बताए ।

उनले संविधान संशोधनको मुद्दा लिएर समाजवादी पार्टी सरकारका सामिल भएकाले यसप्रति पार्टीले आवश्यक गृहकार्य गरिरहेको जानकारी दिए ।

प्रदेश नम्बर २ का मुख्यमन्त्री लालबाबु राउतले मानवीय विकास सूचकाङ्कमा प्रदेश नम्बर २ कर्णाली प्रदेशभन्दा पनि पछाडि रहेको बताउँदै प्रदेशको समग्र विकासका लागि प्रदेश सरकार कटिबद्ध रहेको बताए । मुलुकमा रहेको तीन वटै तहका सरकारबीचको समन्वय र सहकार्यले नै वीरगञ्जको विकास हुने बताउँदै उनले आगामी तीन वर्षभित्र प्रदेश नम्बर २ सरकारले तीन हजार युवालाई रोजगार दिएर आत्मनिर्भर बनाउने लक्ष्य लिएको धारणा व्यक्त गरे ।

मुख्यमन्त्री राउतले जबसम्म विकासको रकम सहीरुपमा खर्च हुँदैनन्, तबसम्म देशमा सुशासन कायम हुन नसक्ने पनि बताए ।

पाँच बिघा पाँच कट्ठा क्षेत्रफलमा फैलिएको सो बस टर्मिनल नगर विकास समितिको ९० प्रतिशत ऋण सहयोगमा १५ करोड ७० लाख ८६ हजार ४४१ रुपैयाँको लागतमा निर्माण भएको छ । सो बस टर्मिनलमा तल्लो तल्लामा लविङ रुम प्रतिक्षालय, टिकट काउन्टर, उपचार केन्द्र, फोटोकपी, खानेपानी, लगेज रुम, ब्युटिपार्लर रुम, रेष्टुराँ तथा कार्यालयसहित आधुनिक बसपार्क रहेको छ ।

सो बस टर्मिनलभित्र ५५ वटा सटर रहेको छ । सो बस टर्मिनलभित्र १२४ वटा बस, १७ वटा टाटा सुमो, ५० वटा मोटरसाइकल, २१ वटा टागां र ४० वटा रिक्सा पार्किङ गर्ने व्यवस्था रहेको बताइएको छ ।

प्रतिक्रिया दिनुहोस्

%d bloggers like this: