अकुपाइ टुँडिखेल : प्रकृतिलाई माया गरौं भन्दै रोपियो खरीको विरुवा « Nagarik Khabar

अकुपाइ टुँडिखेल : प्रकृतिलाई माया गरौं भन्दै रोपियो खरीको विरुवा



काठमाडौं । खुल्लामञ्च अतिक्रमणविरुद्ध सञ्चालित अकुपाई टुँडिखेल अभियान अन्तर्गत प्रकृतिलाई माया गरौं भन्ने सन्देशसहित सनिबार टुँडिखेलमा खरीको विरुवा रोपिएको छ ।

विभिन्न वहानामा उपत्यकाका खुल्ला स्थान अतिक्रमण हुन थालेपछि नागरिक समाज तथा स्थानीय युवाहरु अकुपाई टुँडिखेल अभियानमा जुटेका हुन् । अकुपाई टुँडिखेल अभियानको दोश्रो कार्यक्रम अन्र्तगत सनिबार टुँडिखेलमा खरीको विरुवा रोपिएको हो ।

यसअघि अघिल्लो सनिबार खुल्लामञ्चको चारै तर्फबाट मानवसाङ्लो बनाएर अभियान सुरु गरिएको थियो । अभियानमा राजनीतिक दलका नेता कार्यकर्ता, कलाकार, स्थानीय, नागरिक समाजका अभियन्ता तथा युवाहरुको सहभागिता थियो ।

अभियान अन्र्तगत शनिबार प्रकृतिलाई माया गरौं रुखविरुवाको संरक्षण गरौं भन्ने सन्देश दिँदै टुँडिखेलमा खरीको विरुवा रोपिएको हो । अकुपाई टुँडिखेल अभियानका संयोजक विजय श्रेष्ठले पछिल्लो समय राजधानी उपत्यकाका रुखहरु काटिँदै गएको तर रोप्ने काम नभएकाले प्रकृतिलाई माया गरौं भन्ने सन्देश दिनका लागि प्रतिकात्मक रुपमा खरीको विरुवा रोपिएको बताए ।

खुल्ला स्थान अतिक्रमण हुनबाट जोगाउनका लागि ३ महिनाको समय दिएर सुरु गरिएको अकुपाई टुँडिखेल अभियान अन्र्तत आगामी दिनमा सञ्चालित कार्यक्रमहरुमा जनप्रतिनिधिहरुलाई ल्याएर खरीको बोटमा सपथ खुवाईने अभियानकै अर्का सदस्य गणपतिलाल श्रेष्ठले बताए ।

भुकम्पपछि अस्थाई रुपमा प्रयोग गरिनुको साथै खुलामञ्चको केही भाग विभिन्न संघ संस्थालाई दिइएको छ । त्यसैगरी त्यहाँ स्थित दुइ गुठीले पनि व्यवसायिक प्रयोजनका लागि जग्गा भाडामा लगाएका छन् । खुलामञ्चमा वीर अस्पतालको स्टोररुम देखि निर्माण सामग्री राख्ने, गाडी पार्किङ्ग गर्ने गरिएको छ । पुरानो बसपार्कमा भ्युटावर बनाउने भएपछि अस्थायी रुपमा शहरी बसपार्क पनि खुलामञ्चमा नै गराईएको छ ।

अनधिकृत पार्किङ गर्ने र विभिन्न बहानामा जमिन ढलान गर्ने तथा पछिल्लो समय सो स्थानमा स्थाई प्रकृतिका संरचना बन्न थाले पछि चौतर्फी बिरोध हुदै आएको थियो । खुलामञ्च अरुको कब्जामा जान थालेको भन्दै अभियन्ताहरुले गत शनिबार देखि अकुपाई टुँडिखेल अभियान सुरु गरेका हुन् । खुलामञ्चलाई अतिक्रमणबाट बचाउन तीन महिनासम्म प्रत्येक शनिबार अकुपाई अभियान अन्तर्गत विभिन्न कार्यक्रम गरिने छ ।

प्रतिक्रिया दिनुहोस्

%d bloggers like this: