विराटनगर महानगरपालिकामा पोषण भत्ता सुरु, १०१ वर्षीय रेग्मीलाई भत्ता प्रदान



मोरङ । विराटनगर महानगरपालिका–३ का १०१ वर्षीय नारायणप्रसाद रेग्मीलाई १२ हजार रुपैयाँ प्रदान गरी आजदेखि पोषण भत्ता अभियान शुभारम्भ गरिएको छ ।

महानगरप्रमुख भीम पराजुली र वडाध्यक्ष विनोद बस्नेतले ज्येष्ठ नागरिक रेग्मीको घरमै गई उक्त रकम उपलब्ध गराउनाका साथै सँगै गएका चिकित्सकले उनको स्वास्थ्य परीक्षणसमेत गरेका थिए । यसैगरी वडा नम्बर ३ का ९३ वर्षीय कृष्णकुमार न्यौपानेको घरमै पुगेर १२ हजार रुपैयाँ भत्ता उपलब्ध गराइएको थियो ।

महानगरपालिकाले ८४ वर्ष उमेर नाघेका ज्येष्ठ नागरिकलाई पोषण भत्ताबापत मासिक एक हजार रुपैयाँ उपलब्ध गराउने निर्णय अनुसार एकमुष्ट १२ हजार रुपैयाँ प्रदान गरेको हो । महानगर प्रमुख पराजुलीले ८४ वर्ष उमेर नाघेका ज्येष्ठ नागरिक देवतातुल्य भएकाले उनीहरुको दर्शन र आशीर्वाद लिन घरदैलोमा पोषण भत्ता उपलब्ध गराउने अभियान शुरु गरिएको बताए ।

चाँडै नै निःशुल्क आँखा शिविर सञ्चालन गरी ८४ वर्ष उमेरका ज्येष्ठ नागरिकलाई निःशुल्क चस्मा उपलब्ध गराउनाका साथै एक चिकित्सकलाई घरदैलोमै पुर्‍याएर स्वास्थ्य जाँच गरिने जानकारी दिँदै उनले ज्येष्ठ नागरिकहरुलाई लट्ठी र टर्चलाइटसमेत वितरण गरिने बताए ।

विराटनगर महानगरपालिकाभित्र ८४ वर्ष उमेर नाघेका एक हजार २४६ ज्येष्ठ नागरिकहरुको बसोबास छ । आजै विराटनगर–३ स्थित आदर्श उपभोक्ता मञ्चको भवनमा ८४ वर्ष उमेर नाघेका तीन ज्येष्ठ नागरिकलाई पोषण भत्ता वितरण गरिएकोे थियो ।यस्तै वडा नं ३ का ७० ज्येष्ठ नागरिकलाई पनि आजै पोषण भत्ता वितरण गरिएको थियोे ।




mode_editप्रतिक्रिया




menu LIVE TV
menu LIVE TV