'अपमानजनक सन्धिबाट मुलुकलाई मुक्त गरौं'


SHARES

काठमाडौं । नेपाल कम्युनिष्ट पार्टी (नेकपा)का सांसद भीम बहादुर रावलले असमान र अपमानजनक सन्धीबाट मुलुकलाई मुक्त गर्न सरकारले कुटनीतिक र राजनीतिक पहल गर्नुपर्ने बताउनुभएको छ ।

प्रतिनिधिसभाको मंगलबारको बैठकको विशेष समयमा बोल्दै उहाँले शक्तिशाली सरकारले विगतमा भएका गलत सम्झौताबाट मुलुकलाई मुक्त राख्नुपर्ने धारणा राख्नुभएको हो । उहाँले नेपालको सार्वभौम सत्तामा आँच पुर्याउने गोर्खा भर्ती केन्द्र बन्द गर्नुपर्ने तर्क गर्नुभयो ।

उहाँले भन्नुभयो “नेपाली युवा युवतीलाई विदेशी सेना भर्ती गरिने नेपालको सार्वभौमसत्तामा आंच पुर्याउने निरंकुश राणा शासनले थोपरेको गलत सम्झौताबाट देशलाई मुक्त गरिनुपर्छ । भुतपुर्व गोर्खाका न्यायोचित आवाज सुनिनुपर्छ र त्यसलाई सम्बोधन गरिनुपर्छ ।”

उहाँले नेपाल कुनै पनि शक्ति राष्ट्रसंघको संयुक्त सैनिक अभ्यासमा सहभागी हुन नहुने तर्फ सरकारलाई सचेत गराउनुभयो । उहाँले भन्नुभयो “कुनै पनि शक्ति राष्ट्रसंग कुनै पनि प्रकारको सामरिक गठजोडमा संलग्न हुन नेपालको संविधानले अनुमति दिदैन । त्यस त्यसप्रकारको गठजोडमा लाग्नु नेपालको हितमा पनि छैन । देश भित्र र बाहिर संयुक्त बहुराष्ट्रिय सैनिक अभ्यासमा नेपालको संलग्नता गलत हुन्छ । प्राकृतिक विपदको सामना गर्ने उद्देश्यमा सिमित रहेर सुरक्षा निकायकाबीच तालिम र अनुभवको आदान प्रदान गर्न सकिने भएतापनि ठूलो संख्यामा सेनालाई संलग्न गराएर दुईपक्षीय सैनिक अभ्यासमा पनि नेपाल अब संलग्न हुनु हुदैन । ”

उहाँले छिमेकी देश र अन्तराष्ट्रिय जगतमा भएको घटनाबाट पाठ सिकेर तात्कालिन राजनीतिक परिस्थितिलाई गम्भीर विश्श्लेषण गर्दै राष्ट्रहितका पक्षमा दृढताका साथ उभिनुपर्नेमा जोड दिनुभयो । शान्ति प्रक्रियाका बाँकी काम पुरा नगर्न विदेशी हस्तक्षेप बढ्न सक्ने भन्दै उहाँले सत्य निरुपण तथा मेलमिलाप आयोग र वेपत्ता व्यक्तिको छानबिनको बाँकी काम अबिलम्ब पुरा गर्न सरकारको ध्यानाकर्षण गराउनुभयो ।

संसदीय समितिका सदस्यहरुबाट राष्ट्रिय परिचय पत्रमा राखिएका जानकारी सार्वजनिक पहुँचमा पुग्ने आशंका व्यक्ति भईरहेका बेला सांसद रावलले राष्ट्रिय परिचयपत्र, गाडीका नम्बर प्लेट, कार, भन्सारको महसुल संकलन जस्ता संवेदनशील तथ्यांकहरुको अभिलेख विदेशी सर्भरमा राख्न दिन नहुने तर्फ सरकारको ध्यानाकर्षण गराउनुभयो ।

सांसद देवेन्द्र राज कँडेलले निर्मला पन्त घटनाको बारेमा गृहन्त्री राम बहादुर थापाले दिएको अभिव्यक्ति प्रति आपत्ती जनाउनुभयो । मन्त्री थापाले ‘निर्मला प्रकरण हिजो पनि भएका थिए, आज पनि छ र भोली पनि केही समय रहन्छ ’भनेर घटनालाई हल्का रुपमा प्रस्तुत भएको भन्दै उहाँले ‘के तपाईको परिवारमा पनि निर्मला पन्त जस्तै घटना भएको भए त्यही अभिव्यक्ति हुने थियो ? ’भनी प्रश्न गर्नुभयो ।

निर्मला पन्त प्रकरणलाई २०३८ सालमा पोखरामा भएको नमिता–सुनिता प्रकरण संग तुलना गर्दै उहाँले विगतमा श्रीपेचको आडमा र अहिले विना श्रीपेचका सिंहदरबारका जनप्रतिनिधिबाट घटना भएको दाबी गर्नुभयो ।

कँडेलको अभिव्यक्तिमा नेकपाका सचेतक शान्ता चौधरीले नियमापत्ति गरेपछि नेपाली कांग्रेसका मीन विश्वकर्माले सांसद बोलिरहेको अवस्थामा उठेर बोल्ने कुन नियममा छ भन्दै दोहोर बाजाबाज गराउन नपाईने भन्दै सभामुखको ध्यानाकर्षण गराउनुभएको थियो ।

त्यसैगरी नेकपाका सांसद अग्नि प्रसाद सापकोटाले रुग्न उद्योग संञ्चालन गर्ने सम्बन्धमा उद्योग मन्त्रालयले के गरिरहेको छ भन्दै त्यसबारे जानकारी माग गर्नुभयो ।

उहाँले दोलखाको खरी ढुङ्गामा २०३५ सालमा ओरेन म्याग्नेसाईटको खानी सञ्चालनका ओरेण्टी म्याग्नेसाईट कम्पनी लिमिटेड भएर गठन भएको उद्योग अहिले सम्म सञ्चालन आउन नसकेको भन्दै सो कम्पनी संञ्चालन गर्ने सम्बन्धमा विशेष अध्ययन गरि आवश्यक पहल गर्न अर्थ र उद्योग मन्त्रालयको ध्यानाकर्षण गराउनुभयो ।

सरकारको ७५ र निजी क्षेत्रको २५ प्रतिशत शेयर रहेको सो कम्पनीले उत्पान सुरु गर्ने हो भने बार्षिक २ अर्ब भन्दा बढीको निर्यात गर्र्ने दाबी उहाँले गर्नुभयो ।

लामो समय देखि मुद्दा चलिरहेको सो कम्पनी संञ्चालन गर्ने तर्फ सरकारको अहिले सम्म ध्यान नजानुले सरकार कसरी चलेको छ भन्ने तस्वीर देखिएको भन्दै उहाँले सो कम्पनीको स्थितिबारे यथार्थ जानकारी गराउन पनि माग गर्नुभयो ।


SHARES


mode_editप्रतिक्रिया




menu LIVE TV
menu LIVE TV