काेराेना कहर: सुरक्षाका पर्याप्त साधन नपाउँदा कपडाकै भरमा सुरक्षाकर्मी


SHARES

नेपालगन्ज । सुरक्षाका पर्याप्त साधन नपाउँदा कपडाकै भरमा सुरक्षाकर्मी कोरोना विरुद्ध लडिरहेका छन् । देशकै सबैभन्दा कोरोना जोखिमपूर्ण क्षेत्र बाँकेको नरैनापुरमा खटिएका सुरक्षाकर्मी कपडाकै भरमा छन् ।

सुरक्षाका पर्याप्त साधन नपाउँदा प्रहरीमै संक्रमण देखिएको छ। एक जना प्रहरी जवानलाई कोरोना संक्रमण पुष्टि भएको छ। जिल्ला प्रहरी कार्यालय बाँकेका प्रमुख प्रहरी उपरीक्षक वीरबहादुर ओलीकाअनुसार नरैनापुर गाउँपालिकाको कालाफाँटा प्रहरी चौकीमा कार्यरत एक जना प्रहरी जवानलाई कोरोना संक्रमण पुष्टि भएको हो ।

उनीसँगै कोरोना परीक्षण गरेका २३ जना प्रहरीमध्ये धेरै जनाको रिपोेर्ट अझै आउन बाँकी रहेको प्रमुख ओलीले बताए । नरैनापुर गाउँपालिकामा शनिबारसम्म एक सय १४ जनामा कोरोना संक्रमण पुष्टि भइसकेको छ भने एक जना २५ वर्षका युवाको कोरोनाबाट मृत्यु भइसकेको छ । केही दिनदेखि नरैनापुरमा संक्रमितलाई नेपालगन्जको आइसोलेसनमा ल्याउन लाग्दा स्थानीयले अवरोध गरेका छन्। कोरोना संक्रमितहरू पनि आइसोलेसनमा आउन नमानेर भाग्न खोजिरहेका छन्।

उनीहरूको भीड नियन्त्रण गर्न प्रहरी खटेका छन्। यसरी खटेका नेपाल प्रहरीसँग राम्रो मास्क नै छैन। डब्लुएचओकाअनुसार कोरोनाबाट जोगिन एनके ९५ माक्स लगाउनुपर्छ तर कोरोनाको अति जोखिमपूर्ण क्षेत्र नरैनापुरमा कार्यरत कुनै पनि प्रहरीसँग त्यस्तो मास्क छैन। न त उनीहरूसँग स्यानिटाइजर नै छ। प्रहरी प्रमुख ओली नै प्रहरीहरूले कपडाको माक्स मात्र लगाइरहेको स्वीकार्छन् । झन्डै एक सयको संख्यामा रहेको प्रहरीलाई जिल्लाले मुस्किलले तीन चार वटामात्र एनके ९५ मास्क र निकै थोरै मात्रामा सर्जिकल मास्क पठाइएको जिप्रकाले जनाएको छ ।

‘ड्यूटीमा खटेका प्रहरी कपडाको मास्क लगाएका हुन्छन् । संक्रमित नै झम्टिन आउँछन् । जोगिएर बस्नुपरेको छ,’ ओली भन्छन्, ‘फ्रन्टलाइनमा काम गर्ने सुरक्षाकर्मी जोखिम नै जोखिममा काम गरिरहेका छन् ।’ शुक्रबार नरैनापुरमा १३ जना संक्रमित पुष्टि भए । उनीहरूलाई नेपालगन्ज ल्याउने क्रममा राति ८ः४५ बजेतिर ९ जना संक्रमित एम्बुलेन्समा आउन नमानेर गाउँमा भागे । उनीहरूलाई लैजान नदिन ठूलो संख्यामा गाउँलेहरूले विरोधमा उत्रिए । उक्त समाचार आजको अन्नपूर्ण पोष्टमा छापिएको छ ।

 


SHARES


mode_editप्रतिक्रिया




menu LIVE TV

२०७७ साल असार २० गते, शनिबार

menu LIVE TV