गौरीका सिंह र मण्डेकाजी श्रेष्ठ वर्षको उत्कृष्ट खेलाडी घोषित « Nagarik Khabar

गौरीका सिंह र मण्डेकाजी श्रेष्ठ वर्षको उत्कृष्ट खेलाडी घोषित



काठमाडौं । एनएसजेफ पल्सर स्पोर्टस् अवार्डमा पौडीकी गौरीका सिंह र कराँतेका मण्डेकाजी श्रेष्ठले उत्कृष्ट महिला तथा पुरुष खेलाडीको अवार्ड जितेका छन । नेपाल खेलकूद पत्रकार मञ्चले आयोजनाको गरेको अवार्डमा गौरिका सिंह र मण्डेकाजी श्रेष्ठ उत्कृष्ट महिला तथा पुरुष खेलाडी घोषित भएका हुन ।

विसं २०७६ मा राष्ट्रिय तथा अन्तर्राष्ट्रिय खेलकूद प्रतियोगितामा गरेको प्रदर्शनका आधारमा दुवै जना उत्कृष्ट खेलाडीका रूपमा घोषित हुनुभएका हुन ।

गौरीकाले कराँतेकी अनु अधिकारी, तेक्वान्दोकी आयशा शाक्य, एथलेटिक्सकी सन्तोषी श्रेष्ठ र ट्रायथलनकी सोनी गुरुङलाई पछि पार्दै उत्कृष्ट खेलाडीको अवार्ड जितेकी हुन । गौरीकाले १३औँ दक्षिण एशियाली खेलकूद (साग) मा चार स्वर्ण, दुई रजत र तीन कास्य पदक गरी नौ पदक जितेकी थिइन । उनले सागमा सर्वाधिक स्वर्ण जित्ने तेक्वान्दोका दीपक विष्टको कीर्तिमानसँग बराबरी गरेकी थिइन । गौरीकाले आठौँ राष्ट्रिय खेलकूदमा १२ स्वर्ण पदक जितेकि थिइन । गौरीकाले कम उमेरमा ओलम्पिक खेल्ने कीर्तिमानसमेत बनाइसकेकी छिन । उनले जापानको टोकियो ओलम्पिक खेल्ने पक्का भइसकेको छ ।

मण्डेकाजीले गल्फका सुवास तामाङ, तेक्वान्दोका कमल श्रेष्ठ, एथलेटिक्सका गोपीचन्द्र पार्की र फुटबलका विकेश कुथुलाई उछिन्दै उत्कृष्ट पुरुष खेलाडीको अवार्ड जितेका हुन । यी सबै खेलाडीले गत वर्ष नेपालमा सम्पन्न १३औँ दक्षिण एशियाली खेलकूद (साग) मा स्वर्ण पदक जितेका थिए । उक्त प्रतियोगितामा मण्डेकाजीले कराँतेतर्फ टिम काता र एकल गरी दुई स्वर्ण पदक जितेका थिए । उनले आठौँ राष्ट्रिय खेलकूदमा एकल कातामा स्वर्ण र टिम कातामा रजत जितेका थिए ।

त्यसैगरी नेपाली राष्ट्रिय महिला भलिबल टोली वर्ष २०७६ को उत्कृष्ट टोली घोषित भएको छ । गत वर्ष महिला भलिबलमा नेपालले ऐतिहासिक सफलता प्राप्त गरेको थियो । बङ्गलादेशमा भएको प्रथम एभिसी महिला सिनियर सेन्ट्रल जोन भलिबल प्रतियोगितामा नेपाली महिला टोलीले उपाधि जितेको थियो । उक्त टोलीका प्रशिक्षक जगदीशप्रसाद भट्ट रहेका थिए । सो प्रतियोगितामा नेपालले खेलेका सबै छ खेलमा विजयी भएको थियो । त्यस्तै गत वर्ष नेपालमै सम्पन्न १३औँ दक्षिण एशियाली खेलकूद (साग) मा रजत पदक प्राप्त गरेको थियो । महिला भलिबल टोली फाइनलमा भारतसँग पराजित भएको थियो । नेपाली महिला टोलीले सागमा पहिलोपटक रजत पदक प्राप्त गरेको हो । खेलमा नेपाल भारसँग ३–२ सेटले पराजित भएको थियो ।

त्यसैगरी भोटिङका आधारमा भएको पिपल्स च्वाइस अवार्डको उपाधि भलिबलकी कप्तान अरुणा शाहीले जितेकि छिन । उनले सर्वाधिक मत प्राप्त गर्दै सो अवार्ड जितेकी हुन । अरुणाले कूल ३७ दशमलव ५२ प्रतिशत मत प्राप्त गरेकी थिइन ।

उक्त विधातर्फ दोस्रो स्थानमा सागको कराँतेमा दोहोरो स्वर्ण पदक जितेका मण्डेकाजी श्रेष्ठ रहेका छन । उनले २८ दशमलव ४५ प्रतिशत मत पाएका थिए । तेस्रो स्थानमा बास्केटबलकी कप्तान सदिना श्रेष्ठ रहेकि छिन । उनले १३ दशमलव १३ प्रतिशत मत प्राप्त गरिन ।

चौथो स्थानमा रहेकी पौडीकी गौरीका सिंहले १३ दशमलव तीन प्रतिशत र पाँचौँ स्थानमा रहेकी महिला फुटबल टोलीकी स्ट्राइकर सावित्रा भण्डारीले सात दशमलव दुई प्रतिशत मत प्राप्त गरिन । अरुणालाई उक्त अवार्ड जिताउनका लागि पोखरामा अभियान नै चलाइएको थियो ।

त्यसैगरी उत्कृष्ट युवा खेलाडीको अवार्ड गल्फका सुवास तामाङले जिते । उनले सागमा दुई स्वर्ण पदक जितेका थिए । सुवासले तेक्वान्दोका भूपेन श्रेष्ठ र सिना मादेन लिम्बू, भारत्तोलनकी सञ्जु चौधरी र जुडोकी पुनम श्रेष्ठलाई पछि पारेका हुन ।

यसैगरी एउटै खेलबाट सर्वाधिक १२ स्वर्ण पदक दिलाउने तेक्वान्दोका प्रमुख प्रशिक्षक नवीनकुमार श्रेष्ठ उत्कृष्ट प्रशिक्षक घोषित भएका छन । उनले कराँतेका प्रमुख प्रशिक्षक मदनकुमार उप्रेती, उसुका अमरकुमार थिङ, बक्सिङका प्रकाश थापामगर र पौडीका शङ्कर कार्कीलाई उछिन्दै उक्त अवार्ड जितेका हुन ।

टेवलटेनिसका ऐतिहासिक पदक विजेताद्वय गीता क्षेत्री र सिजरिन शाह लाइफटाइम अचिभमेन्ट अवार्डबाट सम्मानित भए । दुवै जना सन् १९९१ मा आयोजित पाँचौँ दक्षिण एशियाली खेलकूदका स्वर्ण विजेता हुन् । नेपाली महिला खेलाडीले सागमा जितेको त्यो नै पहिलो स्वर्ण पदक थियो ।

यस वर्षको स्पेसल अवार्ड एथलेटिक्सकी सन्तोषी श्रेष्ठ र तेक्वान्दोकी आयशा शाक्यले संयुक्तरूपमा प्राप्त गरे । दुवै जना १३औँ सागका स्वर्ण विजेता हुन् । उनीहरु आ–आफ्नो खेलका लागि विशेष पदक जित्ने कीर्तिमानी खेलाडी पनि हुन् । सन्तोषीले सागमा महिला १० हजार मिटर दौडमा नेपाललाई ऐतिहासिक स्वर्ण पदक दिलाएकी थिइन । त्यस्तै आयशाले १३औँ सागमा दुई स्वर्ण पदक जितेकी थिइन । उनले तेक्वान्दोको पुम्सेतर्फ एकल तथा टिम स्पर्धामा स्वर्ण जितेकी हुन ।

पारा एथ्लिट अवार्डबाट यस वर्ष ह्वीलचियर बास्केटबल तथा क्रिकेट खेलाडी दिगमसिंह चेम्जोङले पाएका छन ।

हरेक वर्षको विश्व खेलकूद पत्रकार दिवस, जुलाइ २ मा आयोजना गरिँदै आएको अवार्ड कोरोना महामारीका कारण यस वर्ष छ महिनापछि धकेलिएको हो ।

हंशराज हुलासचन्द एण्ड कम्पनीको मुख्य प्रायोजन रहेको अवार्डका वर्ष खेलाडी पुरुष, महिला, युवा खेलाडी तथा वर्ष प्रशिक्षकका विजेताले पल्सर मोटरसाइकल पुरस्कारस्वरुप प्राप्त गरेका छन । अन्य विधाका विजेताले भने जनही रु ५० हजार पुरस्कार पाएका छन ।

दश विधामा अवार्ड प्रदान गरिएको हो । वर्षको उत्कृष्ट पुरुष, महिला र युवा खेलाडी, उत्कृष्ट प्रशिक्षक, स्पेसल, लाइफटाइम अचिभमेन्ट, पिपुल्स च्वाइस, प्यारा एथलिट सम्मान, टिम अफ द इयर तथा अन्तर्राष्ट्रिय खेलकुद पत्रकारिता अवार्ड समावेश गरिएको थियो ।

ललितपुरको सातदोबोटोस्थित कराँते हलमा कोरोना भाइरसको महामारीका कारण उक्त कार्यक्रम सेमी भर्चुअलका रूपमा आयोजना गरिएको राससले जनाएको छ ।

प्रतिक्रिया दिनुहोस्
%d bloggers like this: