महिला खुला हाफ म्याराथनको उपाधि धादिङकी रसिलालाई « Nagarik Khabar

महिला खुला हाफ म्याराथनको उपाधि धादिङकी रसिलालाई



दमौली । व्यास नगरपालिका कार्यालयद्वारा दमौलीमा अन्तर्राष्ट्रिय नारी दिवसका अवसरमा आयोजित प्रथम व्यास नगर महिला खुला हाफ म्याराथन प्रतियोगितामा धादिङका २१ वर्षीया रसिला तामाङ प्रथम भएकी छन् ।

दमौलीको व्यासगुफादेखि व्यास नगरपालिका–११ तनहुँसुरसम्मको करिब २१ किलोमिटर दूरीको दौडमा उनले एक घन्टा ४९ मिनेटमा उक्त दूरी पार गर्दै प्रथम भएकी हुन् ।

त्यसैगरी खोटाङ अ‍ैसेली गाउँपालिकाकी प्रिया राईले एक घन्टा ४९ मिनेट एक सेकेण्डमा पार गर्दै द्वितीय, सोलुखुम्बुकी अनिता राईले एक घन्टा ५५ मिनेट ३२ सेकेण्डमा पार गरी तृतीया भएकी छन् । त्यसैगरी चौथो नेपाली सेना कालिकोटकी विषेशता ऐडी, पाँचौँ भानु माध्यमिक विद्यालयकी विद्यार्थी नम्रता गुरुङ, तनहुँ ऋषिङकी सीता रानाभाट छैटौँ, भक्तपुरकी आइसा श्रेष्ठ सातौँ र ओखलढुङ्गाकी पद्मकुमारी सुनुवार आठौँ भइन् ।

प्रतियोगितामा विजयी हुनेले प्रथम पुरस्कार रु ४१ हजार ७७, द्वितीय पुरस्कार रु ३१ हजार ७७ र तृतीय पुरस्कार रु २१ हजार ७७ प्रदान गरिएको छ । त्यसैगरी पाँच जनालाई रु ११ हजार ७७ का दरले सान्त्वना पुरस्कार प्रदान गरिएको छ । गण्डकी प्रदेशसभा सदस्य सरिता गुरुङ, नगर प्रमुख वैकुण्ठ न्यौपाने, उपप्रमुख मिरा जोशीलगायतले विजयी खेलाडीलाई पुरस्कार प्रदान गरे ।

नगरपालिकाले खेलकुदका माध्यमबाट पर्यटन प्रवर्द्धन क्षेत्रको विकास गर्ने उद्देश्यले पहिलो पटक म्याराथन प्रतियोगिताको आयोजना गरेको हो । केही समयअघि मात्रै नगरपालिकाले व्यास–५ मानहुँकोटदेखि सहीदग्राम पुलिमराङसम्मको करिब ४२ किलोमिटर दौड प्रतियोगिता सम्पन्न गरिसकेको छ ।

प्रतिक्रिया दिनुहोस्
%d bloggers like this: