अनेरास्ववियूले अर्थमन्त्री पौडेललाई बुझायाे १३ बुँदे ध्यानाकर्षण पत्र « Nagarik Khabar

अनेरास्ववियूले अर्थमन्त्री पौडेललाई बुझायाे १३ बुँदे ध्यानाकर्षण पत्र



काठमाडौं । नेकपा एमाले निकट विद्यार्थी संगठन अनेरास्ववियूले शैक्षिक प्रमाणपत्रका आधारमा शैक्षिक तथा व्यवसायीक ऋण उपलब्ध गराउने विगतको घोषणालाई सहजरुपमा कार्यान्वयन गर्न सरकारको ध्यानाकर्षण गराएको छ ।

बुधबार अर्थमन्त्री विष्णु पौडेललाई १३ बुँदे ध्यानाकर्षण पत्र बुझाउदै अनेरास्ववियूले बैंकका शाखाले न्यूनतम २० जना विद्यार्थीलाई सो प्रकृतिका ऋण उपलब्ध गराउन अनिवार्य व्यवस्था हुनुपर्ने माग समेत गरेका छन् ।

त्यस्तै सो संगठनले सरकारी सेवा सुविधा र जागिरमा रहने सबैका छोराछोरीलाई अनिवार्य रुपमा सामुदायिक सरकारी विद्यालयमा भर्ना गर्ने प्रबन्ध मिलाउन सरकार समक्ष माग गरेको छ ।

अनेरास्ववियूले आगामी बजेटका सन्दर्भमा शिक्षा क्षेत्रमा समेटिनुपर्ने विषयहरूलाई सुझावका रुपमा पेश गर्दै शिक्षा, स्वास्थ्य र रोजगारीका सन्दर्भमा संविधानले गरेको व्यवस्था कार्यन्वयनमा यस वर्षको बजेट आधार वर्षे बन्नुपर्ने बताएको छ ।

विद्यार्थीहरुको ध्यानाकर्षण पत्र बुझ्दै अर्थमन्त्री पौडेलले बजेटको सीमाभित्र रहेर विद्यार्थीहरुले उठाएका मागलाई सम्बोधन गर्ने आश्वासन दिए । त्यस्तै उहाले शैक्षिक प्रमाणपत्रका आधारमा ऋण उपलब्ध गराउने बिषयमा पनि मन्त्रालयले सहज वातावरण बनाउन प्रयास गर्ने बताए ।

अनेरास्ववियूले हरेक प्रदेशमा न्यूनतम एउटा सरकारी शिक्षण अस्पताल खोल्न र ती अस्पतालमार्फत निःशुल्क उपचारको प्रबन्धका लागि बजेटमा व्यवस्था गर्न पनि माग गरेको छ ।

प्रतिक्रिया दिनुहोस्
%d bloggers like this: