पुरातात्विक महत्वका ४ सय ९३ सम्पदा पुनःनिर्माण « Nagarik Khabar

पुरातात्विक महत्वका ४ सय ९३ सम्पदा पुनःनिर्माण



काठमाडौं । गोरखा भूकम्पको छ वर्षको अवधिमा भूकम्पले भत्किएका पुरातात्विक महत्वका ४९३ सम्पदाको पुनःनिर्माण सम्पन्न भएको छ ।

भूकम्प प्रभावित ३२ जिल्लाका ९ सय २० सम्पदामा विसं २०७२ वैशाख १२ गतेको भूकम्पले क्षति पुगेको राष्ट्रिय पुनः निर्माण प्राधिकरणले जनाएको छ ।

क्षतिग्रस्त २८८ सम्पदा पुनः निर्माणको चरणमा रहेको प्राधिकरणका सहप्रवक्ता मनोहर घिमिरेले जानकारी दिए ।

यी सम्पदाको पुनःनिर्माण चालु आर्थिक वर्षमै शुरु गर्ने तयारी छ । तीमध्ये केही सम्पदाको पुनःनिर्माण सुरु भइसकेको छ ।

भूकम्पले विश्व सम्पदा क्षेत्रका १ सय ७०, काठमाडौँ उपत्यकाका तीन जिल्लाका ४ सय ६ र उपत्यकाबाहिरका २९ जिल्लाका ३ सय ४४ गरी ९ सय २० सम्पदामा क्षति पुगेको थियो ।

हालसम्म विश्व सम्पदा क्षेत्रका १ सय १०, काठमाडौँ उपत्यकाका तीन जिल्लाका २ सय ७ र उपत्यकाबाहिरका २९ जिल्लाका १ सय ७६ गरी ४ सय ९३ सम्पदाको पुनः निर्माण सम्पन्न भएको हो ।

चालु आवमा विश्व सम्पदा क्षेत्रका ४९, काठमाडौँ उपत्यकाका तीन जिल्लाका १ सय ११ र उपत्यकाबाहिरका २९ जिल्लाका १ सय २८ गरी २ सय ८८ सम्पदा पुनः निर्माण हुन लागेको प्राधिकरणले जनाएको छ ।

भूकम्पले क्षतिग्रस्त ऐतिहासिक सम्पदा धरहरालाई जस्ताको त्यस्तै राखी उस्तै आकार र प्रकारमा धरहरा टावर निर्माण सम्पन्न भई गत फागुन ११ गते उद्घाटन गरिएको छ ।

यसैगरी भूकम्पले क्षतिग्रस्त राजधानीको मुटुमा रहेको रानीपोखरी पनि गत वर्ष दशैँअघि नै निर्माण सम्पन्न गरी उद्घाटन गरिएको छ । काष्ठमण्डप पनि पुनः निर्माणको अन्तिम चरणमा पुगेको प्राधिकरणले जनाएको छ ।

भूकम्पले भत्किएका सम्पदा अझ राम्रो र बलियो बनाऔँ भन्ने अवधारणाको अवलम्बन गरी पुनःनिर्माण अघि बढेको प्राधिकरणले जनाएको छ ।

विपद् प्रतिरोधक हुने गरी स्थानीय आवश्यकताअनुरूप उपयुक्त प्रविधि अपनाई जीर्णोद्धार, प्रबलीकरण र पुनःनिर्माण गरिएको सहप्रवक्ता घिमिरेले बताए ।

प्रतिक्रिया दिनुहोस्
%d bloggers like this: