पुलिस हेडक्वार्टरमै आयोजित ‘फुली लगाउने’ कार्यक्रममा दुई एआईजी अनुपस्थित « Nagarik Khabar

पुलिस हेडक्वार्टरमै आयोजित ‘फुली लगाउने’ कार्यक्रममा दुई एआईजी अनुपस्थित



काठमाडौं । प्रहरी प्रधान कार्यालयमा आइतबार आयोजित प्रहरी अधिकृतहरुलाई दज्र्यानी चिन्ह सशोभित गर्ने कार्यक्रममा दुई एआइजी भने अनुपस्थित रहे ।

प्रहरी प्रधान कार्यालयमै दरवन्दी रहेका विश्वराज पोखरेल र सहकुल थापा फुली लगाउने कार्यक्रममा अनुपस्थित थिए ।

एआइजी पोखरेल कार्य तथा अनुसन्धान विभाग प्रमुख हुन भने अर्का एआइजी थापाको पदस्थापन भएको छैन ।

प्रहरी प्रधान कार्यालयमा आयोजना गरिएको कार्यक्रममै एआइजीद्वयको अनुपस्थितिले अने धेरै शंका उब्जाएको छ । दुवै एआइजी अहिलेको रोलक्रम अनुसार आइजीपीका मुख्य दावेदारहरु हुन् ।

नेपाल प्रहरीका प्रवक्ता एसएसपी बसन्त कुँवरले भने एआइजीद्वयको अनुपस्थितिबारे अनविज्ञता प्रकट गरे । उनले भने, ‘उहाँहरुको व्यक्तिगत कामले कार्यक्रममा नआउनुभएको होला ।’

नेपाल प्रहरीमा हालै विभिन्न पदमा पदोन्नति भएकामध्ये वरिष्ठ प्रहरी अधिकृत सहित ६१ जना प्रहरी अधिकृतहरु दर्ज्यानी चिन्हद्वारा सुशोभित गरिएको थियो ।

प्रहरी महानिरीक्षक शैलेश थापा क्षेत्रीले प्रहरी प्रधान कार्यालयमा आइतबार आयोजित एक समारोहबीच उहाँहरुलाई दर्ज्यानी चिन्हद्वारा सुशोभन गरेका थिए ।

दर्ज्यानी चिन्हद्वारा सुशोभित हुनेहरुमा नेपाल सरकार मन्त्रिस्तरको २०७८ साउन १४ गतेको निर्णयअनुसार बढुवा भएका प्रहरी नायव महानिरीक्षक सौरभ राणा तथा प्राविधिक प्रहरी वरिष्ठ उपरीक्षक छाँया देवी गुरूङ र नेपाल सरकार सचिवस्तरको सोही मितिको निर्णयअनुसार पदोन्नति भएका प्राविधिक प्रहरी उपरीक्षक रामेश्वर अधिकारी तथा प्रहरी निरीक्षक पदमा पदोन्नति भएका ९८ जनामध्ये ५८ जना प्रहरी निरीक्षक गरी जम्मा ६१ जना प्रहरी अधिकृतहरु रहेका छन् ।

समारोहमा प्रहरी महानिरीक्षक थापा क्षेत्रीले पदोन्नति भएका प्रहरी अधिकृतहरुलाई बधाई तथा शुभकामना दिँदै पदोन्नतिले थपेको नवीन उर्जालाई सदुपयोग गरी आमनागरिकप्रति थप जिम्मेबार भई व्यावसायिक भूमिका निर्वाह गर्दै काम गर्न निर्देशन दिए ।

नयाँ जिम्मेवारीमा खटिँदा नियमित कामको साथै कोभिड–१९ को संक्रमणबाट आफू, परिवार र आम नागरिकलाई सुरक्षा प्रदान गर्न उद्दत हुनुपर्नेमा उहाँले जोड दिए ।

प्रहरी महानिरीक्षक थापा क्षेत्रीले पदोन्नतिको अवसरसम्म पुर्‍याउनका लागि घर परिवारको महत्वपूर्ण योगदान रहेकोले परिवारमा अमूल्य खुसी साटफेर गर्नुपर्ने चर्चा गर्दै घर परिवारलाई समेत नेपाल प्रहरीको तर्फबाट वधाई तथा शुभकामना व्यक्त गरे ।

समारोहमा प्रहरी नायव महानिरीक्षक सौरभ राणाले पदोन्नति भएका प्रहरी अधिकृतहरुको तर्फबाट प्रतिवद्धता मन्तव्य व्यक्त गर्दै पदोन्नतिले हर्ष र गौरव महसुस भएको र प्राप्त नयाँ जिम्मेवारीलाई थप उत्साह, ईमान्दारिता र सुझबुझका साथ उत्कृष्ट रूपमा बहन गर्न आफूहरू प्रतिवद्ध रहेको बताए ।

प्रतिक्रिया दिनुहोस्

%d bloggers like this: