दुर्व्यसनसहित एचआइभी घटाउन अभियान « Nagarik Khabar

दुर्व्यसनसहित एचआइभी घटाउन अभियान



काठमाडौँ । लागुपदार्थ सेवनगर्नेहरूबाट एचआइभी संक्रमण बढ्न थालेकामा यहाँ चिन्ता व्यक्त गर्न थालिएको छ । सुई साटासाट गर्नेबाट एचआइभी बढेको आशङ्कामा त्यसको न्यूनीकरणका लागि सरोकार निकायले अभियान पनि थालेका छन् । बागलुङमै पनि त्यस्ता युवाको संख्या बढिरहेकाले पहिलो चरणमा सुरक्षित सुई लगाउने व्यवस्था गर्ने, त्यसपछि आनीबानीमा परिवर्तन ल्याएर शून्य दरमा घटाउने योजना बनाइएकोे स्वास्थ्य कार्यालयका प्रमुख सुरज गुरौले बताए ।

कम्युनिटी सपोर्ट गु्रपले उक्त कार्यालयको सहकार्यमा यो अभियान थालेको हो । बुधबार आयोजित एक कार्यक्रममा जिल्लामै २ सय ४६ देखि ३ सय २५सम्म युवा लागुपदार्थ सेवनबाटै संक्रमित भएको हुनसक्ने आँकलन गरिएको जानकारी दिइयो ।

कम्तीमा ९० प्रतिशत संक्रमित पहिचान गरेर तिनलाई एआरटी सेन्टर पुर्‍याउने र ९० प्रतिशत भाइरस नियन्त्रण गर्ने योजना उक्त ग्रुपले बनाएको बताइयो । संक्रमित पहिचान भएपछि तिनको आनीबानी परिवर्तन गराउने, समुदायबाटै समस्या समाधान गराउने, पटक–पटक भेटिएका संक्रमितको नियमित अनुगमन गर्ने, साथी–साथी मिलेर सुई लगाउनेलाई एउटै सुई दिने, सुई लगाउने दर घटाउने र शून्यमा पुर्‍याउने लक्ष्यसमेत रहेको जानकारी दिइएको थियो ।

अहिलेसम्म बागलुङमा ६७ युवाले सुईमार्फत लागुपदार्थ सेवन गर्ने गरेको भेटिएको जनाइएको छ । नेपालभर २७ हजारदेखि ३४ हजारसम्म लागुपदार्थ सेवनकर्ता युवा रहेको एक अध्ययन प्रतिवेदनमा उल्लेख छ । पहिलो चरणमा व्यक्ति र परिवारबाटै समस्या समाधान खोज्न जिल्ला समन्वय समितिका अधिकृत खिमबहादुर विकले सुझाव दिए ।

प्रतिक्रिया दिनुहोस्

%d bloggers like this: