नेपाल एयरलाइन्सलाई नाफामा पुर्‍याउँछु : मन्त्री आले (भिडियाे) « Nagarik Khabar

नेपाल एयरलाइन्सलाई नाफामा पुर्‍याउँछु : मन्त्री आले (भिडियाे)



काठमाडौँ । राष्ट्रिय ध्वजाबहाक नेपाल वायुसेवा निगम (नेपाल एयरलाइन्स)लाई अन्तर्राष्ट्रिय उडानमा खतराजन्य पदार्थ आयात तथा निर्यातको अनुमति प्रमाणपत्र जारी गरिएको छ ।

सोमबार पर्यटन मन्त्रालयमा नेपाल वायुसेवा निगमका अध्यक्ष युवराज अधिकारीलाई नागरिक उड्डयन प्राधिकरणका महाप्रबन्धक राजकुमार क्षेत्रीले उक्त प्रमाणपत्र प्रदान गरेका हुन् ।

कार्यक्रममा संस्कृति, पर्यटन तथा नागरिक उड्डयनमन्त्री प्रेमबहादुर आलेले नेपाली ध्वजाबाहक जहाजलाई नाफामा पुर्याएरै छाड्ने बताए ।

उनले अहिले पनि ५० अर्बभन्दा पनि बढी ऋण रहेको भन्दै निगमको खर्च घटाएर नाफामा लैजाने धारणा राखे । त्यस्तै मन्त्री आलेले अन्तर्राष्ट्रिय मापदण्ड पूरा गरेर खतराजन्य पदार्थ आयात तथा निर्यातको अनुमति प्रमाणपत्र पाएको भन्दै व्यवसायीहरुलाई सिधैँ सामान ल्याउन सहज हुने र राज्यलाई पनि नाफा हुने उल्लेख गरे ।

त्यस्तै नेपाल वायुसेवा निगमका अध्यक्ष अधिकारीले निगममाथि आएका दायित्व गम्भीर भएर पुरा गर्ने प्रतिवद्धता जनाए ।

प्रतिक्रिया दिनुहोस्

%d bloggers like this: