माथिल्लो दोर्दी ‘ए’ को बिजुली जेठको अन्तिममा राष्ट्रिय प्रणालीमा जोडिने « Nagarik Khabar

माथिल्लो दोर्दी ‘ए’ को बिजुली जेठको अन्तिममा राष्ट्रिय प्रणालीमा जोडिने



लमजुङ । लमजुङको दोर्दीखोलामा निर्माण सम्पन्न गरी उत्पादनको तयारीमा रहेको २५ मेगावाटको माथिल्लो दोर्दी ‘ए’ जलविद्युत आयोजनाको बिजुली जेठ अन्तिमबाट राष्ट्रिय प्रणालीमा जोडिने भएको छ ।

लमजुङको दोर्दीखोलामा लिवर्टी इनर्जीले निर्माण गरेको आयोजनाको विद्युत् राष्टिय प्रणालीमा थपिन लागेको हो । संरचना निर्माणको काम सम्पन्न गरिसकेको आयोजनाले आगामी जेठभित्रै व्यावसायिक विद्युत् उत्पादन गर्नेगरी सुरुङमा परीक्षण सुरु गरेको हो ।

आयोजनाको संरचना निर्माणको काम सम्पन्न भइ परीक्षण तयारी सुरु गरिएको आयोजनाका सञ्चालक राजेन्द्र वस्तीले बताए । आयोजनाको पुनर्निमाणको काम अन्तिम चरणमा पुगेकाले जेठ अन्तिमबाट व्यवसायिक विद्युत् उत्पादन गरिने आयोजनाले जनाएको छ । आयोजनाबाट २०७६ चैतदेखि विद्युत उत्पादन सुरु गर्ने तालिका थियो ।

प्रसारण लाइनको समस्या, कोरोना महामारी र बाढी पहिरोको कारण उत्पादन तालिका धकेलिँदै आएको हो । यस अघि आयोजना सम्पन्न गर्न ४ अर्ब ६४ करोड ६१ लाख रुपैयाँ लागतमा सम्पन्न भएको थियो । बाढीले पुर्याएको क्षतिको पुनः निर्माण गर्दा लागत बढेको छ ।

आयोजनामा बाँधस्थल लोदो खोलाबाट २७ सय मिटर लामो भूमिगत सुरुङ र २७ सय मिटर लामो पेनस्टक पाइप छ । दोर्दी गाउँपालिका ६ ढोडेनी र ७ फलेनीमा निर्माण गरिएको आयोजनाले तल्लो सिमिस्थित लोदो खोलाको दोभानमा निर्माण गरिएको बाँधबाट मालेबगरमा निर्माण गरिएको विद्युत्‌गृहमा लगेर पानी खसाल्नेछ ।

रन अफ द रिभरमा आधारित उक्त आयोजनाले २०७१ बैशाख १५ मा विद्युत् उत्पादन अनुमति पाएको थियो । आयोजनाको प्रतिमेगावाट लागत १८ करोड ५४ लाख रुपैयाँ रहेको छ ।

आयोजनाबाट वाषिर्क १३ करोड ८४ लाख १० हजार युनिट बिजुली उत्पादन हुनेछ । नदीको बहावमा आधारित (रन अफ द रिभर) प्रकृतिको आयोजनाको प्रतिफल १५.४५ प्रतिशत छ ।

प्रतिक्रिया दिनुहोस्

%d bloggers like this: